Happening

S Häppening (engl. to happen, "bassiere") isch näben em Fluxus äini vo de wichdigste Forme vo dr Akzioonskunst vo de 1960er Joor. E Häppening isch en improvisierts Eräignis diräkt mit em Publikum. Äini vo de früeje Forme vom Häppening isch d décollage. Doo wärde Geegeständ ins Publikum gheit, es git Exhibizionismus, Bluet- und Farborgie, Sache wärde zerstöört, verrisse und verdräckt. S Ziil isch eso s Publikum, wo Däil vom Eräignis isch, z schockiere. Was genau bassiert wäiss au dr Künstler nid im vorab Je nochdäm, wie d Zueschauer reagiere, cha underschiidlig improvisiert wärde. D Häppening si nume sälten vollständig improvisiert. Vilmol wird dr möögligi Verlauf vorhär usbrobiert. Mäistens höi si käi feste zitlige Raame und vilmol wäiss s Publikum nid enmol, wenn s Häppening ume isch. En anders Merkmol vom Häppening isch, ass die verschiidenste Geegeständ verwändet wärde und ass mä sä vilmol zuefellig näbenenander stellt. Das isch au e Grundbrinzip vom Surrealismus.^[1]

1. ↑ Susan Sontag: Happenings. Die Kunst des radikalen Nebeneinanders. (1962) In: Kunst und Antikunst. (1980)